Carta del Papa Juan Pablo II a Mons. Miguel Irizar, C.P.
(en Latín)

Venerabili Fratri

MICHAELI IRIZAR CAMPOS

Episcopo Callaënsi

Te, Venerabilis Frater, qui proxime quintum et vicesimum anniversarium diem ab episcopali ordinatione feliciter recoles, christifideles tuae communitatis Callaënsis Pastorem suum nec non spiritalem magistrum singulari gaudio venerabuntur. Simili ratione se geret grex Yurimaguaënsis, qui antea varios per annos tuae pastorali vigilantiae concreditus erat.

Nos quidem a tantae laetitiae et gratulationis sensibus abesse nolumus, per quos clerus fidelisque populus tuus non modo curriculi tui honorabit metam, verum et pastorales virtutes atque sedulam industriam tuam commemorabit.

Decem annis elapsis ab inito sacerdotio, Peruviam petiisti ut in Limana urbe partes haberes magnae Missionis Conciliaris. Inibi, ex superiorum tuorum voluntate, constitisti ut munus exerceres curionis apud paroeciam Beatae Mariae Virgini vulgo "del Pilar" dicatam; deinde regionale tenuisti regimen tuae Congregationis Passionis Iesu Christi. Anno MCMLXXII Decessor Noster Paulus VI, clarissimae memoriae, te missionale ob studium Vicarium Apostolicum constituit communitatis Yurimaguaënsis addiditque simul tibi titulum Ecclesiae Elotonensis. Pro spiritali illius gregis salute septemdecim per annos vires insumpsisti, postea coadiutor renuntiatus es Praesulis dioecesis Callaënsis, cuius plenum moderamen duos ante annos cepisti. Nec fugit Nos consociata et efficax industria tua apud Conferentiam Episcoporum istius Nationalis: sodalis enim exstitisti Consilii permanentis, preses Commiooossionis Episcopalis pro Actione Sociali, secretarius generalis eiusdem Conferentiae et praepositus es Commissioni de Communicationibus Socialibus. Item apud Generalem Episcoporum Coetum Americae Latinae pervalida explevisti munera.

De his omnibus ac de cunto tuo ministerio omina ex animo significamus, tibi suadentes ut apostolicos labores novatis pergas viribus. Tecum fervidas Domino gratias agentes, Ipsum precamur ut proximum diem XXV mensis Iulii iucundissimum tibi oriri faciat teque, meritis conspicuum, spiritali solacio cumulare dignetur.

Quod reliquum est, caritatis, qua tecum devincimur, pignuns atque caelestium munerum, praesertim hac in singulari vitae tuae celebritate, nuntia sit Apostolica Benefictio quam tibi, Vicariis Generalibus, clero, universo populo nec non necessariis tuis libenter transmittimus.

Ex Aedibus Vaticanis die XX mensis Iunni, anno MCMXCII, Pontificatus Nostri undevicesimo.

Joanne Paulus II

26-Julio-1997